“Sumqayıt Xovlu İplik” ASC

1976-cı ilin dekabr ayında “Sumqayıt Xovlu İplik fabriki” adı altında fəaliyyətə başlamışdır. 1990-cı ilədək müəssisə tam gücü ilə işləmiş, fabrikdə 1447 nəfər işçi çalışmışdır. 1990-97-ci illərdə müəyyən fasilələrlə fəaliyyətini davam etdirmiş, istehsal gücünün 35 %-i həcmində (700 ton/il xovlu iplik) işləmiş, fabrikdə 481 nəfər işçi çalışmışdır. 1997-ci il oktyabrın 13-də Əmlak Nazirliyinin 818 saylı sərəncamı ilə fabrikin bazasında “Sumqayıt Xovlu İplik” Açıq Səhmdar Cəmiyyəti yaradılmışdır. 1998-2001-ci illərdə müəssisə fəaliyyətini tam dayandırmışdır. 2001-ci ildə cəlb edilmiş kredit hesabına istehsal gücünün 3-5 %-i nisbətində (60-80 ton/il) fəaliyyətini qismən bərpa etmiş, 87 nəfər işlə təmin olunmuşdur. 2005-ci il oktyabrın 10-da Səhmdar Cəmiyyətin səhmlərinin 69 %-i MKT İstehsal-Kommersiya MMC tərəfindən alınmışdır. Həmin tarixdə keçirilən İdarə Heyətinin iclasında müəssisədə köklü yenidənqurma işlərinin aparılmasının vacibliyi haqqında məsələ qaldırılmış və 2006-2008-ci illərdə “Sumqayıt Xovlu İplik” ASC-də kompleks rekonstruksiya işlərinin həyata keçirilməsinə dair qərar qəbul edilmişdir. Hazırda müəssisənin nizamnamə kapitalı 2,237,450 AZN təşkil edir.

Müəssisə 24/2 nömrədən 46/2 nömrəyədək saplar istehsal etmək imkanına malik olmuşdur. Alınmış saplardan ildə 40 min ədəd örtük, 130 min ədəd adi və uzunboğaz corab istehsal edilirdi. Müxtəlif ölçü və formalarda trikotaj və üst geyimləri istehsalı isə 20 min ədəd təşkil etmişdir. Müəssisə ildə 100 ton 16 nömrədən 46/2 nömrəyədək yun və yarımyun ipliyi istehsal etmək gücündə olmuşdur. Müəssisənin məhsul portfeli Xovlu iplikdən, Yarımyun ipliyindən, Yun ipliyindən və Trikotaj məhsullarından ibarətdir.

Müəssisənin əsas məhsullarının istehsalı 4 mərhələ və 13 əməliyyatdan ibarət olmuşdur. Bu əməliyyatlar aşağıdakı sexlərdə həyata keçirilmişdir:

Hazırlayıcı sex
Əyrici sex
Cütləyici, burucu-sarıyıcı sex – 2 əməliyyat
Xovlayıcı sex
Yun və yarımyun emalı sexi
Toxucu sexi
Corab sexi
Örtük sexi