|
"Azərboru" ASC "Azərboru" ASC (keçmiş V.I.Lenin adına Azərbaycan boruyayma zavodu) Böyük Vətən Müharibəsinin qurtardıqdan sonra tikilməyə başlamışdır. 1947-ci ildə Moskva şəhərindəki “Qipromez” institutunun layihəsi əsasında Sverdlovskda yerləşən “Uralmaş” zavodunun avadanlıqları ilə Boruyayma aqreqatı 140 tikilmişdir. 1952-ci il dekabrın 31-də birinci Azərbaycan polad borusu yayılmışdır. 31 dekabr 1952-ci il zavodun yaranma tarixi sayılır. Sonralar daha 2 ədəd boruyayma aqreqatı, 2 ədəd pəstahyayma aqreqatı, 6 ədəd poladəridən Marten sobaları tikilib istismara verilmişdir. Sözügedən aqreqatlar 1960-cı ilə qədər tikilib işə buraxılmışdır. Metallurgiya şirkətinin Prezidentinin sərəncamı əsasında 01.06.1993-cü ildə V.I.Lenin adına “Azərbaycan Boru-yayma zavodu” “Azərboru” Istehsal Birliyi adlandırılmışdır. 1998-ci ilin 19 may Azərbaycan Respublikası Prezidentinin fərmanı ilə “Azərboru” Istehsalat Birliyi eyni adlı Açıq Tipli Səhmdar Cəmiyyətə çevrildi və Dövlət Əmlak Komitəsinə özəlləşdirilməyə çıxarıldı. 07.01.2003-cü ildən “Azərboru” Açıq Səhmdar Cəmiyyəti adlanır. Hazırda müəssisəyə kənardan gətirilən boru pəstahlardan boru istehsal olunur və hazır boruların emal olunması işləri aparılır.
«Azəralüminium» ASC-nin Sumqayıt «Alüminium» istehsal sahəsi Azərbaycan Kommunist Partiyasının 60 illiyi adına Sumqayıt alüminium zavodu Azərbaycan SSR əlvan metallurgiya sənayesinin ilk və ən böyük müəssisəsi idi. Tikintisinə 1949-cu ildə (əsas təyinatını müəyyən edən istehsal sexlərinin - elektroliz sexinin və civədüzləndirici yarımstansiyanın tikintisinə 1952-ci ildə) başlanmış, 1955-ci il martın 8-də ilk əlvan metal külçə - ilkin alüminium alınmışdır. 1959-1960-cı illərdə ikinci seriyasının korpusları tikilmiş, 1964-cü ildə elektroliz sexinin alüminium məftil istehsal edən şöbəsi, 1968-ci ildə məişət soyuducuları üçün buxarlandırıcı istehsal edən sexi, 1974-cü ildə alüminium və latun metallardan qab-qacaq istehsal edən sexi, 1976-cı ildə təkrar alüminium külçəsi istehsal edən sexi, 1977-ci ildə həmin sexin metal tullantılarından latun və mis külçələri istehsal edən şöbəsi işə düşmüşdür. Sumqayıt alüminium zavodu 1997-ci ildən öz fəaliyyətini tam dayandırmışdır. 2000-ci ilin aprel ayından «Azəralüminium» ASC-nin Sumqayıt «Alüminium» istehsal sahəsi adlandırılır. Hazırda müəssisədə ilkin alüminium istehsal edən 4 korpus fəaliyyət göstərir. Hollandiyanın «Fondel Metal Partisipeysnz PLS» 25 il müddətinə «Azəralüminium» ASC-ni idarəetməyə götürmüşdür. Müəssisənin profili elektroliz üsulu ilə ilkin alüminium istehsalıdır.
|
Şəhər İcra hakimiyyətinin başçısı
