«Sumqayıt kompressorları» ASC

Sumqayıt Kompressorlar Zavodu dəqiq maşınqayırma müəssisəsi olaraq 1971-ci ildə Yaponiyanın “Nippon Electric Industry” şirkətinin lisenziyası və avadanlığı bazasında tikilmiş və 1972-ci ildə istifadəyə verilmişdir. 1988-ci ildə Yaponiyadan 5 milyon ABŞ dolları məbləğində avtomatik və müasir stator yığım xətti alınmış, mexaniki emal sexində quraşdırılaraq istifadəyə verilmişdir. 1988-89-cu illərdə çuqun tökmə sexinin layihə gücünün artırılması məqsədilə Almaniyadan (ADR) yeni avtomatik nəm qəlibləmə xətti alınmış və quraşdırılıb istifadəyə verilmişdir. 1994-cü ilin iyun ayınadək layihə gücü səviyyəsində işləmiş, Çeçenistanda baş verən hadisələrlə bağlı Şimali Qafqaz dəmir yolu bağlandıqdan sonra zavodun öz satış bazarlarını itirməsi nəticəsində fəaliyyətini dayandırmışdır. 1996-cı ildə müəssisədə mövcud olan avadanlıqların əsasında sənaye kompressorları və onların ehtiyat hissələrinin hazırlanmasına başlanılmışdır. 2001-ci ildə BMT-nin İnkişaf Proqramının xətti ilə ekoloji layihəyə əsasən (ozon qatının mühafizəsi) İtaliyanın “Sikplant İnternational” şirkətindən 2 mln. ABŞ dolları məbləğində kompüterlə idarə olunan avadanlıqlar alınaraq müəssisədə quraşdırılmışdır. 2001-ci ildə Açıq Səhmdar Cəmiyyətə çevrilmişdir. Səhmlərin 98.96 faizi Dövlət Əmlakının idarə Edilməsi üzrə Dövlət Komitəsinə, 1.04 faizi əmək kollektivinə məxsusdur.

Zavod paytaxt Bakı şəhərindən 46 km şimalda, Xəzər dənizinin sahilində yerləşir. Ümumi sahəsi 17.6 ha (175620 m²), istehsal sahəsi isə 6.6 ha (66225 m²) təşkil edir. Müəssisənin istehsal sahəsi 6 əsas və 7 köməkçi sexdən ibarətdir:

Əsas sexlər:

Metal-tökmə sexi
Ştamplama sexi
Mexaniki emal sexi
Elektrik mühərrikləri sexi
Rele-Qalvanik-Örtük Sexi
Yığma sexi

Köməkçi sexlər:

Alət sexi
Mexaniki təmir sexi
Elektrik sexi
Buxar-güc sexi
Nəqliyyat-Dəmir yolu sexi
Tikinti-təmir sexi