Xəzər dənizinin sahilində yerləşən Corat qəsəbəsinin tarixi eramızdan əvvəl III, IV minilliklərə təsadüf edir. Xəzər dənizindən Dərbəndə qədər böyük bir ərazini əhatə edən Çora adlı vilayətin paytaxtı Çora böyük liman və ticarət şəhəri olmuşdur ki, Alban katolikosunun rezidensiyası bu şəhərdə yerləşmişdir. Əhalinin əsas məşğuliyyəti balıqçılıq, ticarət, maldarlıq və kənd təsərrüfatı olmuşdur.

Corat qəsəbəsi Bakıdan 35 km şimal-qərbdə, Xəzər dənizin qərb sahilində, düzənlikdə  yerləşir. Qəsəbənin ərazisi 225,6 ha-dır. Iqlimi quru subtropikdir. Orta temperatur yanvarda 3,1⁰C, avqustda 24,9⁰C-dir. Havanın ən aşağı temperaturu -13⁰C yanvar ayında müşahidə olunub, ən isti temperaturu isə +40⁰C  avqust ayında qeydə alınıb. Illik yağıntının miqdarı 185 mm-dir. Corat qəsəbəsi  üçün şimal küləyi – xəzri və cənub küləyi – gilavar xarakterlidir.

2007-ci ilin aprelin 1-i vəziyyətinə Corat qəsəbəsinin əhalisi 8,7 min nəfərdir. Əhalinin ümumi sayının 4,2 min nəfərini (49%) kişilər, 4,5 nəfərini (51%) isə qadınlar təşkil edir. Corat qəsəbəsinin əhalisinin 99,0%-ni azərbaycanlılar, 1,0%-ni isə digər millətlərin nümayəndələri təşkil edir.

Corat qəsəbəsində 49 ədəd ticarət-kommersiya mağazaları və iaşə-xidmət köşkləri fəaliyyət göstərir. Sakinlərin əsas məşğuliyyətini balıqçılıq, maldarlıq, ticarət və fərdi təsərrüfatçılıq təşkil edir. Əhalinin 10%-dən çoxu Sumqayıt şəhərinin sənaye və digər sahələrində çalışır.

Corat qəsəbəsi ərazisində məktəb, uşaq bağçası, mədəniyyət evi, kitabxana, tibbi hissə fəaliyyət göstərir.